حضرت جی! ایک وظیفہ امتحانات اور انٹرویو میں پاس ہونے کے لئے میرا بارہا کا آزمودہ ہے۔جس جس کو بھی بتایا ہے اسے کامیابی ملی ہے۔ اگرکسی کا پیپر اچھا نہ ہوا ہو تواس عمل کی برکت سےوہ امتحانات میں پاس ہوجاتا ہے۔میری ایک کزن پڑھائی میں کافی کمزور تھی اس نے سالانہ امتحانات دیئے ہوئے تھے۔ اس کے بارے میں تو سار ے خاندان کو پتہ تھا کہ یہ دو تین پیپروں میں فیل ہوجائے گی۔ اسے خود بھی امتحانات کے نتیجے سے ڈر لگ رہا تھا۔ میں نے انہیں رزلٹ آنے تک روزانہ کثرت کے ساتھ ’’یَاحَسِیْبُ‘‘ پڑھنے کو بتایا۔ کچھ مسائل کی وجہ سے وہ امتحانات کی تیاری ٹھیک سے نہ کرپائی تھی مگر جب وظیفہ کے بارے میں بتایا تو اس نے خوب محنت شروع کر دی۔ جب نتیجہ آیا تو وہ تمام پیپروں میں پاس تھی اور سارا خاندان حیران تھا کہ یہ کیسے پاس ہو گئی۔ انہوں نے بعد میں بتایا کہ انہوں نےدن رات پاگل ہو کر لاکھوں کی تعداد میں’’یَاحَسِیْبُ‘‘ پڑھا تھا۔
ہمارے ایک عزیز رشتہ دار جس کالج میں پڑھتے تھے وہاں ایک پروفیسر صاحبہ تھیں جن کی نوکری بطور کنٹریکٹ یعنی عارضی تھی۔ انہوں نے ایک گورنمنٹ کالج میں مستقل بنیاد پر سرکاری نوکری کیلئے درخواست دی ہوئی تھی ۔انہوں نےانٹرویو دیا مگر وہ بہت پریشان تھیں کہ کسی طرح مستقل گورنمنٹ نوکری مل جائے۔اس سلسلے میں وہ اپنی کلاس کی لڑکیوں سے پوچھ رہی تھیں کہ کوئی ایسا عمل بتائو کہ جہاں میں نے انٹرویو دیا ہے وہیں میری سلیکشن ہوجائے۔ کوئی لڑکی کچھ عمل بتاتی تودوسری کوئی اور عمل بتادیتی۔ پھرمیری کزن نے انہیں بتایا کہ آپ سارے اعمال رہنے دیں اور جب تک آپ کوسلیکشن کی کال نہیں آتی آپ سارادن لا تعداد ’’یَاحَسِیْبُ‘‘ پڑھنا شروع کردیں۔ ان پروفیسر صاحبہ نے ایسا ہی کیا اورچند دن بعد ہی ان کی مستقل بنیاد پر سلیکشن ہوگئی۔ وہ پروفیسر جب کالج آئیں تو کلاس میںساری لڑکیوںکوچھوڑ کرمیری کزن کو گلے ملیں کہ تمہارے بتائے عمل کی برکت سے میرا کام بن گیا ہے ۔
میں نے بھی 16گریڈ کی نوکری کے لئے امتحان دیا ہے اور اس دوران مسلسل یہی وظیفہ پڑھ رہا ہوں جس کی برکت سے امتحان بھی بہت اچھا ہوا ہے اور قوی امید ہے کہ ان شاءاللہ اس عمل کی برکت سے مجھے بھی سرکاری نوکری مل جائے گی۔جب بھی یہ عمل کیا ہے الحمدللہ مراد ملی ہے۔